Vi minner om at turane til Stedjeåsen og Flot har bytta plass i programmet. Det betyr at vi tek turen til Stedjeåsen søndag 2. juni, og ikkje til Flot. Det kjem også annonse i Sogn avis.

Søndag 5. mai var Barnas turlag på tur til turposten ved Olavskjelda. Tilsaman 42 personar (20 barn og 22 vaksne) var med på turen. Mange spreke små som gjekk heile vegen! Det var mykje spennande å sjå, både av natur og historie. Jammen var det nysnø i stien fleire plassar også, så våren er sein i år. Foto: Liv Norunn Hamre

 

Turbo er med!

Sjå fleire bilete under Les meir.

Søndag 28. april var Barnas turlag på vårtur til turposten på Flot. Vi møttes på Barsnes i litt sur og kald vind, men når vi kom opp i skogen vart det fint. Heile 14 barn (+14 vaksne) var med på tur. Vel framme fekk alle skrive seg i boka, og turleiar Kjell Vidar Johansen fortalte litt om plassen. Flot er eit gamalt stølsområde, der det framleis står ei uteløe, og vi såg restar etter fleire tufter. Matpausen tok vi frampå kanten, med utsikt over Sogndal. Snøbygene gjekk i fjella rundt oss, men vi slapp nesten heilt unna nedbøren. Vi hadde ein flott tur!

Vel framme fekk alle skrive seg i boka! (Foto: Liv Norunn Hamre)

På grunn av sein vår, vert den planlagte turen til Stedjeåsen søndag 28. april flytta til 2. juni. Søndag 28. april tek vi turen til Flot, som opprinneleg skulle gå 2. juni. Sjå også annonse i Sogn avis.

På grunn av mykje is i vegen, vart Barnas turlag og Barneidretten sin planlagte sykkeltur til turposten i Saurane, erstatta med sykling på Kvåle. Barneidretten hadde lagt ut kjegler til å sykle mellom, og elles nytta vi dei fine uteområda på Kvåle, med alt frå flat asfalt til kupert turløype på grus. 26 unge og ivrige syklistar fann vegen til Kvåle i kveld!

Tysdag 9. april starta Barnas turlag sykkelsesongen med sykkeltur til turposten i Stedjeberget. Heile 31 spreke born og 24 vaksne møtte opp for å bli med oss på sykkeltur. Vel ute ved turposten skein sola og gåsungane var utsprungne på selja, så vi fekk ein anelse om at våren er på veg! Maskotten vår Turbo takkar alle borna for ein fin sykkelkveld!

 

 Turbo på sykkeltur!

 

 

 

Kalde 19 grader syner gradestokken når vi nærmar oss ”Gåpn”. Mars- morgonen er av det svært kalde slaget.  Men sola varmar kjølte  turgåarar  i det vi  kliv opp frå Leirdalen. Utsynet  mot Hest og  fjella rundt oss er mektig. Blant Josetedalen sine mange ”hangande”  dalar er  Leirdalen i særklasse.  Motbakken vi har føre no byr på  raskt stigande   høgdemetrar. Eit vellagt spor frå tidlegare  gjer det mest enno lettare.

Grøssete, Sogndal Turlag si lagshytte, er turmål når 4 spreke skigutar frå ”Fjøra” dreg på opp lia. Dagen er utan vind og kulde, sola varmar mars- laurdagen og vottane kan ligge øverst i sekken. Gutane skiftar på å gå først. Det gjer oppstigninga lettare. På toppen av Kvamsfossen er det tid for varm saft. Grøssete, det gamle stølshuset som var ferdig ombygt i 2001, ligg no i høveleg distanse på 860 høgdemeter. Snøen er lett og djup i det vi kliv den siste kneika opp til stølen. Foto og tekst Marino J. Ask

Godt besøk og god stemning på Kom deg ut dagen i Hodlekve.

Trekking av premiar for 2012 og Programslepp for 2013

Regn, mørkt og grått – typisk november kanskje? Ja, sett frå stoveglaset i Sogndal var det ganske dekkande for opplevinga. ”I dag møter ingen tenkte turleiaren, men, det stemmer jo ikkje. Her stiller tre spreke ungdommar og ein vaksen på Almenningen. Dermed dreg gruppa på 5 austover mot Vigdalen. Tradisjonen tru var det Vangsen som var annonsert skiturmål for Sogndal Turlag seinhaustes. Men med lite sikt over 1000 høge, kjem det betre høve til å vitje Vangsen. Alle foto: Marino J. Ask
Videosnutt her!